गंगापूर । वार्ताहर

तालुक्यात घरफोड्या करून धुमाकूळ घालणार्‍या एका टोळीला स्थानिक गुन्हे शाखेच्या पथकाने अटक केली आहे. त्यांच्याकडून 92 हजार100 रुपयांचा मुद्देमाल जप्त करण्यात आला आहे. संदीप चव्हाण (18), सुरेश भोसले ( 27), ऋषिकेश भोसले (20 ),लखन भोसले (19) (रा. गंगापूर जि. औरंगाबाद), असे अटक करण्यात आलेल्या आरोपींची नावे आहेत. विलास सुरासे यांनी शिल्लेगाव पोलीस ठाण्यात फिर्याद दिली की, 20 मे रोजी त्यांच्या घराचा दरवाजा तोडून अज्ञात चोरट्यांनी सोन्या-चांदीचे दागिने व रोख रक्कम असा एकूण 60 हजार 500 रुपयांचा मुद्देमाल चोरून नेला आहे. 

त्यावरून शिल्लेगाव पोलीस ठाण्यात गुन्हा दाखल करण्यात आला होता. त्यानुसार पोलिसांनी चोरी झालेल्या घटनास्थळाची पाहणी करून तपासाची चक्रे फिरवली. सखोल तपासाअंती पोलिसांना माहिती मिळाली की, सदरचा गुन्हा हा संदीप चव्हाण व त्याच्या साथीदारांनी मिळून केला आहे. संदीप चव्हाण यास ताब्यात घेऊन विचारपूस केली असता त्याने सदर गुन्ह्याची कबुली दिली आहे. त्यानुसार पोलिसांनी आरोपींचा शोध घेऊन चौघांना अटक केली आहे. दरम्यान, पोलिसांनी त्यांच्याकडून दुचाकी, मोबाईल व रोख रक्कम असा एकूण 92 हजार100 रुपयांचा मुद्देमाल जप्त केला आहे. दरम्यान, आरोपींकडून आणखी काही गुन्हे उघडकीस येण्याची शक्यता पोलिसांनी वर्तवली आहे.