औरंगाबाद । वार्ताहर

शहरातील जालना रोडवरील अपना बाजार मार्केटमधील इलेक्ट्रॉनिक वस्तूंचे शोरूम फोडून चोरट्यांनी सुमारे 13 लाख रुपयांच्या 27 एलईडी चोरून नेल्याची घटना आज समोर आली आहे. 

लॉकडाउन सुरू असल्याने मागील दोन महिन्यांपासून हे शोरूम बंद होते. नेहमीप्रमाणे शोरूमचे मालक लकी दुमडा सकाळी दुकानाकडे फेरफटका मारण्यासाठी गेले असता त्यांना शोरूमचे शटर उचकटलेले व अर्धवट उघडे दिसले. त्यांनी आत डोकावून पाहिले असता त्यांना चोरी झाल्याचे लक्षात आले. त्यांनी तात्काळ ही माहिती पोलिसांना दिली. दरम्यान, शोरूम शेजारील बिअर बारचे तीन शटर उचकटून चोरीचा प्रयत्न झाला आहे. पोलिसांनी घटनास्थळी भेट दिली असून पोलीस अज्ञात चोरट्यांचा शोध घेत आहेत.