औरंगाबाद । वार्ताहर

 कोरोनाची धास्ती धरून बसलेल्या औरंगाबादकरांसाठी एक दिलासादायक बातमी समोर आली आहे. राज्य राखीव दलाचे 67 जवान कोरोनामुक्त झाले आहे. काही दिवसांपुर्वी राज्य राखीव दलाच्या 73 जवानांना कोरोनाची लागण झाली होती. मात्र आता या जवानांमधील 67 जवान आता कोरोनामुक्त झाले आहे. यामुळं औरंगाबादेतील एकूण कोरोनामुक्त झालेल्या रुग्णांची संख्या आता 379 वर पोहचली आहे. गेल्या काही दिवसांपासून औरंगाबादेत कोरोना व्हायरसने कहर केला आहे. दरदिवसाला शहरात कोरोनाचे 50 हून अधिक रुग्ण आढळून येत होते. त्यामुळं जिल्ह्यातील कोरोनाग्रस्तांची संख्या झपाट्यानं वाढून 1 हजार 73 वर गेली होती. मात्र असं असलं तरी आतापर्यंत 379 रुग्ण कोरोनामुक्त झाल्यानं कोरोना संकटात औरंगाबादकरांना मोठा दिलासा मिळाला आहे. जिल्ह्यात आतापर्यंत कोरोनामुळं 35 जणांना आपला जीव गमवावा लागला आहे. सध्या 704 रुग्णांवर रुग्णालयात उपचार सुरू आहे.