रहिमाबाद । वार्ताहर

तालुका कृषी कार्यालयाच्या वतीने एक ते सात जुलै हा कृषी संजीवनी सप्ताह शेतकर्‍यांच्या प्रतिसादामुळे उत्स्फूर्तपणे साजरा करण्यात आला असल्याची माहिती गोळेगाव मंडळाचे अधिकारी शाहूराव मोरे यांनी दिली.

महाराष्ट्रचे माजी मुख्यमंत्री हरित क्रांतीचे प्रणेते वसंतराव नाईक यांच्या जयंतीनिमित्त हा सप्ताह साजरा करण्यात येतो .सुधारित शेती पद्धती कशा प्रकारे करावी याची माहिती या सप्ताहात शेतकर्‍यांना देण्यात येते. पिकांची गुणवत्ता, उत्पादकता वाढविण्यासाठी जनजागृती करणे तसेच या वर्षीचा खरीप व रब्बी हंगामात उत्पादन वाढविण्यासाठी शेतकर्‍यांच्या बांधावर जाऊन तालुक्यातील मंडळ व कृषी सहाय्यक यांनी संपूर्ण सप्ताहात तालुका कृषी अधिकारी दीपक गवळी यांच्या मार्गदर्शनाखाली वैज्ञानिक पद्धतीने शेती करणाविषयी जनजागृती केली असल्याचे गोळेगाव मंडळाचे अधिकारी शाहूराव मोरे यांनी सांगितले.