औरंगाबाद । वार्ताहर

शासकीय वैद्यकीय महाविद्यालय व रुग्णालय (घाटी) औरंगाबाद तर्फे कोरोना विषाणूचा संसर्ग रोखण्यासाठी व कोरोना रोगाच्या कामासंदर्भात एकत्रित ठराविक वेतनावर कंत्राटी पद्धतीने विविध पदांची भरती करावयाची आहे. त्यासाठी महापालिकेत उमेदवारांची मोठ्या प्रमाणात गर्दी झाली आहे. 

याबाबतची सविस्तर जाहिरात शासकीय वैद्यकीय महाविद्यालय व रुग्णालयाच्या संकेतस्थळावर प्रसिद्ध करण्यात आली होती. या जाहिराती अंतर्गत विविध जीवरसायनशास्त्र, विकृतीशास्त्र, सुक्ष्मजीवशास्त्र, न्यायवैद्यकशास्त्र विभाग, औषधीशास्त्र विभाग, बालरोगशास्त्र विभाग, वार्धक्यशास्त्र विभाग, बधिरीकरणशास्त्र विभाग, स्त्री रोग व प्रसुतीशास्त्र विभाग, कान, नाक व घसाशास्त्र विभाग, शल्यचिकीत्सा शास्त्र विभाग, सीव्हीटीएस आयसीसीयु, कॅम्युलटी जे आर 1 आणि एन. आय. सी. यु. इत्यादींची पदे प्रसिद्ध करण्यात आली. दरम्यान, कोरोनाच्या पार्श्वभूमीवर अनेकांना आर्थिक चणचण भासली आहे, तसेच बेरोजगारीचे प्रमाण वाढल्याने महापालिकेत उमेदवारांची एकच गर्दी पडल्याचे बोलले जात आहे.