औरंगाबाद । वार्ताहर

शहरातील शिवाजीनगर भागात सिमकार्ड विक्रेत्याला अडवून त्याच्याकडून रोख 450 रुपये, एक मोबाईल व टी.व्ही.स्टार मोटारसायकलची चोरी करून फरार झालेल्या सराईत गुन्हेगारास पुंडलिकनगर पोलिसांनी जेरबंद केले आहे. इरफान शेख (25 रा. गारखेडा परिसर) असे अटक करण्यात आलेल्या सराईत आरोपीचे नाव आहे. याप्रकरणी पुंडलिकनगर पोलीस ठाण्यात गुन्हा दाखल करण्यात आला होता. 

पोलिसांनी दिलेल्या माहितीनुसार, विकास भारकड यांनी फिर्याद दिली होती की, 29 फेब्रुवारी रोजी सिमकार्ड विकून घराकडे जात असताना शिवाजीनगर भागात तिघांनी मिळून अडवले. खिशातील 450 रुपये, एक मोबाईल व एक टीव्ही स्टार मोटारसायकल बळजबरीने हिसकावून घेऊन फरार झाला. पोलिसांनी शोध घेतला असता पोलिसांना माहिती मिळाली की, सदरची चोरी इरफान शेख व त्याच्या दोन साथीदारांनी मिळून केली आहे. ते तिघे मुंबईला पळून गेले होते. शुक्रवारी इरफान शेख इसार पेट्रोल पंप येथे आल्याची गुप्त माहिती पोलिसांना मिळाली. त्यानुसार पोलिसांनी छापा टाकून त्यास अटक करून न्यायालयासमोर हजर केले असता न्यायालयाने त्यास दोन दिवसांची कोठडी मंजूर केली आहे. दरम्यान त्याच्याकडून चोरीचा माल हस्तगत करण्यात आला आहे.