भोकरदन । वार्ताहर 

कर्नाटकातून विदर्भात  जाणारा ट्रक सह 65 लाखाचा गुटखा   हसनाबाद पोलिसांनी काल दि 12 रोजी मध्यरात्रीच्या दरम्यान  पकडला आहे. कर्नाटक कडून विदर्भात गुटखा  घेऊन जाणार्‍या ट्रकची माहिती  हसनाबाद पोलीस ठाण्याचे सहायक पोलीस निरीक्षक एम एन शेळके यांना मिळताच त्यांनी पोलीस कर्मचार्‍यासह त्या ट्रकचा शोध घेत तो ट्रक जालना ते भोकरदन रोडवर तपोवन पाटीजवळ एक संशयित ट्रक भरधाव वेगाने जातांना दिसला  या ट्रकचा पोलिसांनी पाठलाग करून तो राजूर जवळ मध्यरात्री दोन वाजेच्या सुमारास पकडला.

ट्रकमध्ये 65 लाखाच्या गुटख्यासह चालकाला ताब्यात घेऊन त्याची चौकशी केली असता, कर्नाटकातील गुलबर्गा येथून गुटखा घेवून बुलढाणा जिल्ह्यात मलकापूर येथे जात असल्याचे सांगितले.या ट्रकमध्ये 50 गोण्या गुटखा असून ट्रक जप्त करण्यात आला आहे. पोलीस अधीक्षक एस. चैतन्य, अप्पर पोलीस अधीक्षक समाधान पवार, भोकरदनचे उपविभागीय पोलीस अधिकारी सुनील जायभाये यांच्या मार्गदर्शनाखाली सपोनि. एम. एन शेळके यांच्यासह कर्मचार्‍यांनी कारवाई केली आहे.