माजलगाव येथे श्री स्वामी समर्थ पुण्यतिथी सप्ताह
माजलगाव / प्रतिनिधी
श्री स्वामी समर्थ पुण्यतिथी निमीत्त प्रतिवर्षी अखंड नाम जप, यज्ञ सप्ताह आयोजीत केला जात असे,परंतू कोरोना च्या पार्श्वभूमीवर या सप्ताहातील सर्व अध्यात्मिक सेवा भाविक सेवेकऱ्यांनी आपआपल्या घरीच करण्याचे आवाहन अखिल भारतीय श्री स्वामी समर्थ गुरुपीठ त्र्यंबकेश्वर तथा श्री स्वामी समर्थ सेवा मार्ग दिंडोरी दरबारचे पीठाधीश परमपूज्य गुरुमाऊली अण्णासाहेब मोरे यांनी केले आहे.
१४ एप्रिल ते २० एप्रिल या सप्ताह काळात श्री गुरुचरित्र ग्रंथ सकाळी आठ वाजल्यापासून वाचनास सुरुवात करावे तसेच सुलभ भागवत, नवनाथ भक्तीसार, श्री श्रीपादचरित्र तसेच श्री स्वामीचरित्रसारामृत, श्री दुर्गासप्तशती, रुद्र पठण या सर्व अध्यात्मिक सेवा सर्व नियमांचे काटेकोरपणे पालन करुन भाविक सेवेकऱ्यांनी घरीच करावे व केलेल्या सेवेची नोंद श्री स्वामी समर्थ सेवा केंद्र,शाहू नगर माजलगाव येथे करावी.घरीच बसून स्वामी समर्थ पुण्यतिथी सप्ताह सेवा करुन प्रशासनाकडून येणाऱ्या सर्व सूचनांचे पालन करुन शिस्तीचे दर्शन घडवावे व प्रशासनाला सहकार्य करावे असे आवाहन करण्यात आले आहे.