शहर पोलीस स्टेशनला सॅनिटायझर व मास्कचे वाटप  

माजलगांव । वार्ताहर

माजलगाव शहरातील सामाजिक कार्यामध्ये सतत अग्रेसर असलेल्या माजलगाव किराणा असोसिएशनच्या वतीने आज माजलगाव शहर पोलीस स्टेशन येथे कार्यरत असलेले पन्नास पोलीस कर्मचारी व वीस होमगार्ड यांना सॅनिटायझर व मास्क चे वितरण शहर पोलीस ठाण्याचे पी.आय.सुरेश बुधवंत व व्यापार्‍यांच्या हस्ते करण्यात आले.

लॉकडावूनच्या काळात पोलीसांनी डोळयात तेल घालुन काम केले त्यामुळे मोठया प्रमाणात कोरोना महामारीशी सामना करण्यात शहर यशस्वी ठरले या सर्वात कोव्हीड योध्दे म्हणुन गणल्या जाणार्‍या पोलीसांना देखील बर्‍याच वेळा आपल्या जिवाची पर्वा न करता काम करावे लागले यातुन कोठेतरी उतराई व्हावे म्हणुन येथील किराणा असोसिएशनने पोलीस कर्मचारी व होमगार्ड यांच्या संरक्षणासाठी मास्क आणि सॅनिटायझरचे वितरण पोलीस स्टेशन आवारात केले. किराणा व्यापारी असोसिएशनच्या या स्तुत्य उपक्रमाचे शहर पोलीस स्टेशनचे पोलीस निरीक्षक सुरेश बुधवंत यांनी कौतुक करीत आभार व्यक्त केले तसेच शासनाचे वेळोवेळी निघालेल्या आदेशांचे पालन करीत माजलगाव शहरातील व्यापार्यांनी जे प्रशासनाला सहकार्य केले त्याबद्दलही आभार व्यक्त केले. यावेळी पोलीस कर्मचारी, होमगार्ड, व्यापारी संजय सोळंके, कपिल पगारिया आदींसह इतर किराणा असोसिएशनचे पदाधिकारी उपस्थित होते.