माजलगाव । वार्ताहर

चारण्यासाठी सोडलेल्या गायींवर निर्दयीपणे कोयत्याचे वार केले. गायी पिकात घुसल्याने संतप्त शेतमालकासह कामावर असलेल्या दोघांनी हे टोकाचे पाऊल उचलले, यात सहा गायी जखमी झाल्या. ही घटना शहराजवळील बंजारानगर परिसरात रविवारी घडली.

कृष्णा रघुनाथ राठोड (22, रा. बंजारानगर, माजलगाव) व इतर चार ते पाच शेतकरी गायी चारण्यासाठी जवळच्या गायरानात गेले होते. गायरानाला चिकटून कैलास विष्णू धायजे (रा. जयभीमनगर, माजलगाव) याचे शेत आहे. शेतात त्याने भाजीपाल्याची लागवड केलेली आहे. सायंकाळी पाच वाजता यातील काही गायी भाजीपाल्यात शिरल्या. यावेळी कैलास धायजे व त्याच्याकडे कामाला असलेल्या दोघांनी सहा गायींवर कोयत्याने हल्ला केला. यात गायी गंभीर जखमी झाल्या. कृष्णा राठोड यांच्या फिर्यादीवरुन तिघांवर शहर पोलीस ठाण्यात कलम 428, 429, 511, 34 भादंविसह कलम 11, 12 प्राण्यांना कू्रर वागणूक प्रतिबंधक अधिनियम 1960 अन्वये गुन्हा नोंद करण्यात आला. सहायक फौजदार सुंदर पवार अधिक तपास करत आहेत.