शिरूर । वार्ताहर

भाचीला सोडून स्वतःच्या गावाकडे परत निघेलेल्या मामाचा दुचाकी घसरल्याने डोक्याला मार लागून जागीच मृत्यू झाला. हा अपघात शनिवारी सायंकाळी नांदेवली शिवारात झाला.

रमेश चांगदेव सवासे (34, रा.विघनवाडी, ता.शिरुर) असे त्या मृत व्यक्तीचे नाव आहे. शनिवारी सकाळी 10 वाजता रमेश सवासे त्यांच्या भाचीला तिच्या गावी वरंगळवाडी येथे सोडण्यासाठी दुचाकी वरून (एमएच.23 एपी.366) गेले होते. भाचीला सोडून विघनवाडीला परत येत असताना सायंकाळी 5 वाजताच्या सुमारास वाटेत नांदेवली शिवारात ते दुचाकी घसरून खाली पडले. या अपघातात डोक्याला मार लागल्याने नाकातोंडावाटे रक्तस्त्राव होऊन त्यांचा जागीच मृत्यू झाला. याप्रकरणी शिरूर का. पोलीस ठाण्यात अकस्मात मृत्यूची नोंद झाली असून पुढील तपास सहा. फौजदार सिरसाट करत आहेत.