पहिल्यांदाच शंभरपेक्षा अधिक स्वॅब पाठवण्याची वेळ

बीड । वार्ताहर

जिल्ह्यात शनिवार ते मंगळवार या चार दिवसात एकुण 12 जण कोरोना बाधित रुग्ण सापडल्यानंतर खबरदारी म्हणून त्यांच्या संपर्कात आलेल्या व्यक्तींचेही स्वॅब घेतले जात आहेत. बुधवारी (दि.20) एका दिवसात बीड जिल्ह्यात एकुण 114 थ्रोट स्वॅब अहवाल तपासणीसाठी लातूरच्या प्रयोगशाळेत तपासणीसाठी पाठवण्यात आले. महत्वाचे हे की, जिल्ह्यातून एकाचवेळी 100 पेक्षा अधिक स्वॅब तपासणीला जाण्याची पहिलीच वेळ आहे. आता या रिपोर्टकडे जिल्ह्याचे लक्ष लागले आहे. 

बुधवारी नव्याने 114 लोकांचे स्वॅब तपासणीसाठी घेण्यात आले आहेत. जिल्ह्यात आतापर्यंत 20 कोरोनाबाधित आढळले होते. पैकी आष्टी तालुक्यातील सांगवी पाटण येथील एका रुग्णाचा मृत्यू तर सहा उपचारासाठी पुण्याला गेले आहेत. त्यामुळे त्यांची संख्या जिल्ह्याच्या एकूण आकडेवारीतून वगळण्यात आलेली आहे. जिल्ह्यात आता कोरोना बाधितांचा एकूण आकडा 13 राहिला आहे. पैकी पिंपळा येथील एक कोरोनामुक्त झालेला आहे. सध्या जिल्हा रुग्णालयात 12 रुग्णांवर उपचार सुरू आहेत. तसेच बुधवारी आणखी जिल्ह्यातून 114 स्वॅब घेऊन प्रयोगशाळेत तपासणीला पाठविले आहेत. यात कवडगाव थडी (ता.माजलगाव) येथील दोघांचे स्वॅब दुसर्‍यांदा पाठवण्यात आले आहेत. सर्व रिपोर्ट रात्री उशिरापर्यंत येतील अशी माहिती आरोग्य विभागाकडून देण्यात आली. 

बीडमधे बाधीत रूग्ण आढळेला परिसर अनिश्‍चित काळासाठी बंद 
बीड : शहरातील मोमीनपुरा-अशोकनगर येथे मंगळवारी दोन कोरोना बाधीत रूग्ण आढळून आले तसेच सावतामाळी चौकात लागण झालेले तीन रूग्ण आढळले आहेत. त्यामुळे या परिसरातील इतर ठिकाणी कोरोनाचा प्रार्दूभाव होऊ नये म्हणून मोमीनपुरा-अशोकनगर परिसरातील गफूर इब्राहीम मिस्त्री यांच्या घरापासून बीलालभाई बर्तनवाले यांच्या घरापर्यंतचा व जयभवानीनगर,सावतामाळी चौक परिसरातील बाबुराव मारोतीराव दुधाळ यांच्या घरापासून ते कुंडलीक खांडे यांच्या घरापर्यंत कंटेन्मेंट झोन घोषीत करण्यात आला आहे. हा सर्व परिसर पुढील अनिश्‍चित कालावधीसाठी बंद करण्यात येऊन संचारबंदी लागू करण्यात आली असल्याचे जिल्हाधिकारी राहुल रेखावार यांनी म्हटले आहे. याबाबत बुधवारी सायंकाळी आदेश जारी करण्यात आला आहे.