न्युमोनियाचे प्रमाण पाहूनच रेमेडेसिवीरची गरज ठरवणे आवश्यक

खासगी रुग्णालयवाले उठ-सुठ रेमडेसिवीर मागवू लागले

बीड । वार्ताहर

राज्याचे मुख्य सचिव सिताराम कुंटे यांनी कालच राज्यातील जिल्हाधिकार्‍यांशी संवाद साधून आरोग्य यंत्रणेचा आढावा घेत असताना जिल्हा रुग्णालयातील ऑक्सीजन प्लांटवर देखरेख करण्यासाठी आणि प्रत्येक रुग्णाला ऑक्सीजन मिळावा यासाठी वितरणाचे देखील नियोजन करण्यासाठी महसूल, पोलीस आणि औषधी प्रशासनातील अधिकार्‍यांचा टास्क फोर्स बनवण्याची सूचना केली आहे. त्याच धर्तीवर बीड जिल्ह्यातही रेमडेसिवीर इंजेक्शन वितरणासाठी टास्क फोर्स जिल्हाधिकार्‍यांनी नियुक्त करावा, ज्यामुळे ज्या रुग्णांना गरज आहे त्यांना वेळेवर रेमडेसिवीर मिळेल व याचा अनावश्यक वापरही टळेल आणि काळाबाजारही थांबेल. जिल्हाधिकारी जगताप साहेबांनी जिल्ह्यातील रुग्णालयांमधील रुग्णांच्या आरोग्यासाठी रेमडेसिवीरवर नियंत्रण ठेवणारा टास्क फोर्स बनवावा ज्यामुळे रुग्णांच्या शरिरातील न्युमोनियाचे प्रमाण अर्थातच एचआरसीटी स्कोअरचे प्रमाण पाहूनच रेमडेसिवीर द्यायचे की नाही याची जबाबदारी टास्क फोर्सवर टाका तरच जिल्ह्यातील गोंधळ थांबणार आहे.
बीड शहरासह अंबाजोगाई, परळी, माजलगाव, आष्टी, गेवराई या ठिकाणी बाधित रुग्णांची संख्या दिवसेंदिवस वाढत आहे. तेथील शासकीय आणि खासगी रुग्णालयांमध्ये कोरोना बाधित रुग्णांवर उपचार करताना रेमडेसिवीर आवश्यक असल्याचे सांगीतले जात आहे. बीड जिल्हा रुग्णालयामध्ये एचआरसीटी स्कोअर पाहून रेमडेसिवीर देण्याचे नियोजन सुरु झाले आहे; मात्र खासगी रुग्णालयात पाच आणि सहा स्कोअर असणार्‍या रुग्णांनादेखील रेमडेसिवीर आणण्यासाठी डॉक्टर आग्रह धरत आहेत. यामध्ये देखील मोठे गौडबंगार असल्याचीही चर्चा आहे. मूळातच रेमडेसिवीर द्यायचे की नाही हे डॉक्टरांनी ठरवायला पाहिजे. परंतु रुग्णांच्या आग्रहामुळे देखील काहीवेळा डॉक्टरांचाही नाविलाज होतो;मात्र उपचार करणार्‍या डॉक्टरांनी निग्रहाने सांगितले तर रुग्णांना ऐकावे लागते किंवा ऐकतात. बीडमध्ये मात्र असे चित्र नाही. साध्या-साध्या हॉस्पीटलमध्येही देखील कोव्हीड सेंटर सुरु केले गेले आहेत. त्या हॉस्पीटलमधील डॉक्टर मंडळी गरज नसतानाही रुग्णांना रेमडेसिवीरचा आग्रह धरत आहेत, असा प्रकारही पुढे आला आहे. गरजू आणि गरिब रुग्णांना वेळेवर आवश्यकतेनुसार रेमडेसिवीर मिळावे यासाठी खासगी आणि शासकीय रुग्णालयात कोरोनाबाधित रुग्णांमधील लक्षणे तपासून आणि सीटी स्कोअरचे प्रमाण पाहून त्या रुग्णालयामध्ये रेमडेसिवीर किती रुग्णांना द्यायचे याची क्रॉस चेकिंग करण्यासाठी टास्क फोर्स नियुक्त करणे आवश्यक होवून बसले आहे. बीड शहर आणि जिल्ह्यामध्ये जुने, अनुभवी अनेक फिजिशियन आहेत. त्यांचा या टास्क फोर्समध्ये समावेश करुन त्यांच्यावर ही जबाबदारी द्यावी. सामाजिक जाणिवेतून ही डॉक्टर मंडळी विना मोबदला काम करतील. त्यासाठी जिल्हाधिकार्‍यांनी बीड, परळी, अंबाजोगाई आणि माजलगाव शहरातील जेष्ठ अनुभवी डॉक्टरांना बोलावून रुग्णांचे रिपोर्ट पाहून रेमडेसिवीर आवश्यक आहे की नाही याचा अहवाल देण्यासाठी टास्क फोर्स बनवणे आवश्यक आहे. 
बीडमध्ये गेल्या काही दिवसापासून शासकीय रुग्णालयात देखील रेमडेसिवीर इंजेक्शनचा मोठ्या प्रमाणात वापर केला जात आहे. रुग्णांकडून देखील इंजेक्शन देण्यासाठी आग्रह केला जात आहे. खासगी रुग्णालयात तीच परिस्थिती आहे. सर्वसाधारण लक्षणे असणार्‍या रुग्णांना घरीच विलगीकरण कक्षात ठेवण्याचे सूचवले जाते. तर काही सौम्य लक्षणे असणार्‍या रुग्णांना कोव्हीड केअर सेंटरमध्ये ठेवले जात आहे. ज्या रुग्णांना न्युमोनियाची बाधा झालेली आहे अशाच रुग्णांना हॉस्पीटलमध्ये दाखल करुन घेतले जातेे; मात्र यातील काही रुग्ण न्युमोनियामध्ये देखील साधारण प्रमाण असल्याचे तपासणीनंतर स्पष्ट होते; मात्र अशा रुग्णांनादेखील काही हॉस्पीटलमध्ये रेमडेसिवीर इंजेक्शन सर्रास दिले जाते. रेमडेसिवीरमुळे शरिराचे किती नुकसान होते, याची कल्पना ही डॉक्टर मंडळी रुग्णांना किंवा रुग्णांच्या नातेवाईकांना देत नाहीत. काही रुग्णालयात देतही असतील परंतु वापर वाढल्यावरुन कोणी याची कल्पना देत असतील असे वाटत नाही. कोरोना बाधितांची संख्या ही दिवसेंदिवस वाढत आहे, त्यामुळे चाचणी केल्यानंतर संसर्ग झाल्याचे लक्षात आले की लोकांमध्ये भीतीही वाढलेली आहे, अशा परिस्थितीत लोकांना आधार देणे गरजेचे आहे. खासगी रुग्णांलयामध्ये अशा रुग्णांना आधार देण्याऐवजी रेमडेसिवीर देण्यावरच भर दिला जात आहे. रुग्णालयाचे बील वाढवण्यासाठीदेखील काही ठिकाणी अशी प्रॅक्टिस केली जात आहे. बीडमधील काही एक-दोन रुग्णालये सोडली तर बाकी रुग्णालयात रेमडेसिवीरचा रुग्णांना सर्रास डोस दिला जात आहे. त्यासाठी या रुग्णांचे नातेवाईक दिवस-दिवस जिल्हाधिकारी कार्यालयाच्या दारात बसून आहेत. बीड शहरातील विवेकानंद, संजीवनी, नोबेल या रुग्णालयातील डॉक्टरांकडून तरी अशी अपेक्षा नाही. मात्र त्यांच्याकडून देखील रेमडेसिवीरचा आग्रह होत असल्याचे रुग्णांशी चर्चा केल्यानंतर लक्षात आले आहे. इतर रुग्णालयातील डॉक्टरांनी तर कोरोनात धंदा करायचे ठरवलेले आहेच. अशा लोकांवर या टास्क फोर्समुळे नियंत्रण मिळवता येणार आहे. त्यामुळे जिल्हाधिकार्‍यांनी या प्रकरणी सकारात्मक विचार करुन टास्क फोर्सची नियुक्ती करावी, ती प्रशासनाला आणि जनतेलाही फायद्याची ठरणार आहे.

आयएमएने पुढाकार घ्यावा

जिल्हाधिकार्‍यांनी टास्क फोर्स करण्याचा निर्णय घेतला तर इंडियन मेडिकल असोसिएशनने देखील पुढाकार घेवून काही जेष्ठ डॉक्टरांना या टास्क फोर्समध्ये सहभागी होण्याचा आग्रह धरावा. बीड शहरामध्ये या असोसिएशनचे चांगले आणि समाजाभिमुख काम आहे.त्यामुळे शहराबरोबरच जिल्ह्यातही जिल्हाधिकार्‍यांच्या निर्देशानुसार काम करण्यासाठी या संघटनेने पुढाकार घेतला तर नक्कीच फायदा होणार आहे. 

जेष्ठ डॉक्टर मदतीला येतील

बीड शहरासह जिल्ह्यात गेली अनेक वर्ष रुग्णांची सेवा फारशी आर्थिक अपेक्षा न करता वैद्यकीय व्यवसाय करणारे अनेक डॉक्टर आहेत. यामध्ये प्रामुख्याने बीड शहरातील डॉ.पी.के. कुलकर्णी, डॉ.अनिल बारकुल, डॉ.डी.एस.कुलकर्णी, माजलगावमधील डॉ.प्रकाश आनंदगावकर, गेवराईतील डॉ.विजय सिकची, डॉ. झंवर यांच्यासह परळी, अंबाजोगाई येथील डॉक्टर अशा कामाला पुढे येतील, त्यामुळे जिल्हाधिकार्‍यांनी आपल्या यंत्रणेमार्फत अशा डॉक्टरांची माहिती घेवून टास्क फोर्स बनवला तर प्रशासनाला मोठी मदत होईल.