ई-पेपर वाचण्यासाठी येथे क्लिक करा.
आगीचे तांडव;तीन संसार उघड्यावर
सुदैवाने जिवीतहानी नाही
माजलगाव । वार्ताहर
तालुक्यातील मोगरा येथील शिवाजीनगर तांडा येथे झालेल्या गॅस सिलेंडरच्या स्फोटात तीन सख्या भावांची घरे जळून खाक झाली. गुरुवारी (दि.25) दुपारी अडीच वाजेच्या सुमारास ही घटना घडली. सुमारे तासभर आगीचे तांडव चालू होते.
माजलगाव नगरपालिकेच्या अग्निशमन दलाने आग आटोक्यात आणण्यासाठी आटोकाट प्रयत्न केले. मात्र, काही वेळातच शेजारीशेजारी असणारी तीनही घरे जळून राख झाली. या घटनेत तीनही भावांचे संसार उघड्यावर पडले आहेत.महसूल पथकाने तीनही घरांची पंचनामे केली आहेत.आगीत तीनही घरातील संसारोपयोगी वस्तू जळून खाक झाल्याने मोठे नुकसान झाले आहे. घरात रोख रक्कम, सोन्या चांदीचे दागिने, कपडे कॉट आदी जीवनावश्यक वस्तू जळून खाक झाल्या आहेत.
दरम्यान गॅस गळतीचे प्रमाण मोठ्या प्रमाणात वाढले असून गॅस एजन्सीधारक गॅस टाकी तपासणी न करताच ग्राहकांच्या हवाली करत आहेत. याबाबत ग्राहकात जागृती करण्याचे प्रमाणही कमी असून गॅस एजन्सी कडून जनजागृती आवश्यक आहे.
Leave a comment