माजलगाव । वार्ताहर

माजलगाव तालुक्यातील लहामेवाडी येथे दोघांच्या जाचास कंटाळून एकाने गळफास घेऊन आत्महत्या केली. ही घटना रविवारी (दि.24) घडली. यावरुन दोघांवर आत्महत्येस प्रवृत्त केल्याचा गुन्हा नोंद करण्यात आला.
शहादेव भाऊसाहेब पवार (26,रा.परडी माटेगाव ता.वडवणी) असे मयताचे नाव आहे. गणेश पांडुरंग शिंदे (रा.लऊळ) यांच्या फिर्यादीनुसार, मयत शहादेवचे नामदेव हनुमान नायबळ (रा.लऊळ) व भाऊसाहेब अंकुश पवार (रा.परडी माटेगाव) यांच्याशी आर्थिक व्यवहार होते. पैसे देण्याघेण्यावरुन त्यांच्यात बिनसल्यानंतर काही दिवसांपूर्वी दोघांनी मिळून शहादेवला मारहाण केली होती. त्यांचा त्रास असह्य झाल्याने रविवारी लहामेवाडी शिवारात लिंबाच्या झाडाला दोरीने गळफास घेऊन शहादेवने आत्महत्या केली. त्याच्या खिशात सुसाईट नोेट आढळली. त्यावरुन नामदेव नायबळ व भाऊसाहेब पवार या दोघांवर आत्महत्येस प्र्रवृत्त केल्याचा गुन्हा नोंद करण्यात आला. यातील नामदेव नायबळ यास अटक केलेली असून भाऊसाहेब पवार हा फरार आहे.