आष्टी । वार्ताहर

शेतात जनावरांच्या शेडमध्ये झोपलेल्या एका तरूणांच्या तोंडावर आणि गळ्यावर धारदार शस्त्राने वार करून अज्ञात आरोपींनी हत्या केली. खळबळ उडवून देणारी ही घटना मंगळवारी (दि.23) सकाळी आष्टी तालुक्यातील पिंपरखेड येथे उघडकीस आली. 

 रामदास चव्हाण (35, रा.पिंपरखेड, ता.आष्टी) असे मयत तरुणाचे नाव आहे. पिंपरखेड येथील रामदास चव्हाण हा  तरुण नेहमीप्रमाणे घरापासून जवळच असलेल्या जनावरांच्या शेडमध्ये झोपण्यासाठी गेला होता. तिथे अज्ञात आरोपींनी धारदार शस्त्राने अंगावर वार करून हत्या केली. हत्या का करण्यात आली याचे कारण अद्याप स्पष्ट झालेले नाही. या घटनेची माहिती समजताच पोलीस उपअधीक्षक विजय कबाडे,उपविभागीय पोलीस अधिकारी विजय लगारे,सहायक पोलीस निरीक्षक ज्ञानेश्वर कुकलारे यांनी भेट दिली. या प्रकरणी मयताची पत्नी स्वाती रामदास चव्हाण (रा.पिंपरखेड) यांच्या फिर्यादीवरून गु.र.नं.173/20 कलम 302 भादंविनुसार अज्ञात आरोपीच्या विरोधात गुन्हा दाखल झाला आहे.