बीडमध्ये घरी परतलेल्या परिचारिकेचे जल्लोषात स्वागत

बीड । वार्ताहर

कोरोना कक्षात रुग्ण सेवेचे अत्यंत महत्वपूर्ण कर्तव्य बजावून घरी परतलेल्या शहरातील एका परिचारिकेचे तिच्या कॉलनी व परिसरातील नागरिकांनी फुलांची उधळण, औक्षण करत चक्क तोफा अन् बँडबाजा वाजवून जल्लोषात स्वागत केले. हे स्वागत पाहून परिचारिका व त्यांचे कुटूंब भारावून गेले. 

बीड येथील जिल्हा रुग्णालयात सीमा संतोष जायभाये-विघ्ने यांनी कोरोना कक्षात कर्तव्य बजावले. त्यानंतर बुधवारी त्या घरी परतल्या. शहरातील राधानगरी येथील रहिवाशांनी त्यांचे जल्लोषात स्वागत केले. त्यांच्यावर फुलांची उधळण, फटाक्यांची आतिषबाजी, तोफांची सलामी अन् महिलांनी औक्षण करून त्यांचे जल्लोषात स्वागत केले. हे करताना प्रत्येकाने तोंडाला मास्क आणि सामाजिक अंतर ठेवले होते. अशा स्वागताने लढण्यास बळ मिळत असल्याचे सीमा यांनी सांगितले. हा जल्लोष पाहून त्यांना आनंदाश्रू अनावर झाले.