औरंगाबाद । वार्ताहर
कोविड पॉझिटिव्ह असलेल्या ६५ वर्षीय महिलेचा आज सकाळी ६.५० वाजता घाटी रुग्णालयात मृत्यू झाला. त्यामुळं औरंगाबादमधील करोना बळींची संख्या आता तीन झाली आहे.
संबंधित महिलेवर सुरुवातीला एका खासगी रुग्णालयात उपचार सुरू होते. तिथून १३ एप्रिल रोजी तिला 'घाटी'मध्ये हलवण्यात आलं. मात्र, तिची प्रकृती सुरुवातीपासूनच चिंताजनक होती. 'घाटी'त दाखल केल्यानंतर त्याच दिवशी तिचे लाळेचे नमुने घेण्यात आले. त्याचा अहवाल १६ एप्रिल रोजी आला. त्यात ही महिला करोना पॉझिटिव्ह असल्याचं आढळून आलं. तिला न्यूमोनिया, मधुमेह व उच्च रक्तदाबाचाही त्रास होता, असं 'घाटी' रुग्णालयातील डॉ. अरविंद गायकवाड यांनी सांगितले.