जिल्हा शल्य चिकित्सक डॉ.गित्तेंना सांगूनही उपाययोजना नाही

बीड । वार्ताहर

बीड जिल्हा रुग्णालयामध्ये पाचशेपेक्षा अधिक रुग्ण उपचार घेत असून त्यातील जवळपास 350 रुग्णांना दररोज ऑक्सीजनची आवश्यकता आहे. जिल्हा रुग्णालयामध्ये नर्सिंग वार्डसह इतर दोन वार्डामध्ये ऑक्सीजन बेडची व्यवस्था आहे. मात्र यातील दोन वार्डामध्ये केवळ ऑक्सीजनवर असणार्‍या रुग्णांना पूर्ण क्षमतेने ऑक्सीजन मिळत नसल्याने या रुग्णांची तडफड होवू लागली आहे. रुग्णांच्या नातेवाईकांनी तक्रार करुनही त्याकडे दुर्लक्ष केले जाते. कमी दाबाने ऑक्सीजन मिळत असल्याची तक्रार जिल्हा शल्य चिकित्सक डॉ.सूर्यकांत गित्ते यांच्याकडेही करण्यात आली होती, मात्र त्याकडे त्यांनी पुर्णत: दुर्लक्ष केले आहे. यामुळे मात्र कोरोना रुग्णांचे हाल होवू लागले आहेत.
प्रत्येक वॉर्डमध्ये बायपॅप व व्हेंटिलेटर वरील रुग्ण आढळून येत आहेत. बायपॅप व व्हेंटिलेटर वरील सर्व गंभीर रुग्ण एका वॉर्डमध्ये एकत्र ठेवून त्यांच्यावर उपचार करणे जिल्हा रुग्णालयांमधील कार्यरत असलेल्या फिजिशियन डॉक्टरांना अधिक सोपे जाईल, या संदर्भात सूचना करुनही जिल्हा शल्यचिकित्सक डॉ.गित्ते यांनी यावर काहीही कार्यवाही केलेली नाही. जिल्हा रुग्णालयाची एवढी दयनीय अवस्था असतानाही प्रत्येक वॉर्डसाठी स्वतंत्र वैद्यकीय अधिकारी अद्यापही नेमण्यात आलेला नाही. वेगवेगळ्या वार्डामध्ये ऑक्सीजनचे बेड लावण्यात आल्याने तिथपर्यंत ऑक्सीजन पूर्ण क्षमतेने मिळत नाही. नसिर्ंग वार्डमध्ये तर एकाच पाईपलाईनमधून सस्पेक्ट आणि नर्सिंग वार्डला ऑक्सीजन पाईपलाईन करण्यात आलेली आहे. वास्तविक पाहता या दोन्ही वार्डाला स्वतंत्र पाईपलाईन आवश्यक आहे. आतापर्यंत सर्वात जास्त रुग्णांचे मृत्यू नर्सिंग वार्डमध्ये उपचार घेणार्‍या रुग्णांचे झालेले आहेत.गतवर्षीच्या कोव्हिड साथीपासून ते आत्तापर्यंतच्या मृत पावलेल्या रुग्णांची माहिती काढली तर जास्तीत जास्त रुग्णांचा मृत्यू हा नर्सिंग वार्डमध्ये झाल्याचे निष्पन्न होईल. कारण त्या ठिकाणी गंभीर रुग्ण ठेवले जातात, आणि तेथेच ऑक्सीजनचा पुरवठा कमी होतो. ही बाब रुग्णांवर उपचार करणार्‍या वैद्यकीय अधिकार्‍यांनाही जिल्हा शल्य चिकित्सक डॉ.सूर्यंकांत गित्ते आणि अतिरिक्त जिल्हा शल्य चिकित्सक डॉ.सुखदेव राठोड यांच्या निदर्शनास आणून दिलेली आहे, मात्र त्यांनी या प्रकाराकडे दुर्लक्ष केलेले आहे. आतातरी या गंभीर प्रकाराकडे डॉ.गित्ते यांनी लक्ष द्यावे अशी मागणी रुग्णांच्या नातेवाईकांकडून होत आहे.

सिलेंडर बदलातांनाही दिरंगाई

जिल्हा रुग्णालयात एखाद्या वार्डातील ऑक्सीजनचे सिलेंडर संपल्यानंतर ते बदलण्यासाठी अप्रशिक्षित कर्मचारी असल्याने आणि ते विनाकारण वेळ वाया घालीत असल्याने सिलेंडर बदलताना मोठा वेळ जातो यामध्येही अनेक रुग्णांना फटका बसतो याकडे देखील गरजेचे आहे
 

नर्सिंग वार्डात सर्वाधिक मृत्यू

जिल्हा रुग्णालयामध्ये कोरोना झालेल्या रुग्णांचे जे मृत्यू झालेले आहेत, ते सर्वात जास्त नर्सिंग वार्डमध्ये झाले आहेत. या वार्डामध्ये हाय रिस्क पेशंन्ट म्हणजेच न्युमोनियाचा स्कोअर जास्त आणि ऑक्सीजन सॅच्युरेशन कमी असे रुग्ण ठेवले जातात आणि याच ठिकाणी बायपॅप असेल किंवा थेट ऑक्सीजनव्दारे पुर्ण क्षमतेने ऑक्सीजन पुरवठा होत नाही. त्यामुळे रुग्णांना ऑक्सीजन कमी पडतो, परिणामी रुग्णांचा मृत्यू ओढवतो. गेल्या वर्षभरात जिल्हा रुग्णालयात झालेले मृत्यू तपासले तर याच वार्डात जास्त मृत्यू झाल्याचे निदर्शनास येईल.

व्हेंटिलेटर,ऑक्सीजनचे स्वतंत्र वार्ड एकत्र करा

जिल्हा रुग्णालयाची रचना आणि व्याप्ती पाहिली तर चार आणि पाच डॉक्टरांना रुग्ण तपासणे शक्य नाही. त्यामुळे आयसीसीयु आणि व्हेंटिलेटर असलेला एकच मोठा वार्ड त्याचबरोबर ऑक्सीजनसाठी एक स्वतंत्र वार्ड असे दोन वार्ड केले तर रुग्णांना तपासणार्‍या डॉक्टरांनाही सोपे जाणार आहे. विद्यमान परिस्थितीत सर्वच वार्डात ऑक्सीजन बेड कुठे पाच तर कुठे सात असे आहेत. त्यामुळे डॉक्टरांनाही तपासणे अवघड जाते. हे दोन वार्ड स्वतंत्र करण्याची मागणी गेल्या वर्षभरापासून होते आहे, मात्र ती अद्यापही पूर्ण केलेली नाही. 

पालकमंत्री मुंडेंनीही पाहणी करावी

बीडला येवूनही रुग्णालयाकडे ढूंकून न पाहणार्‍या आणि केवळ औपचारिकता म्हणून प्रशासनाची बैठक घेतल्याचे दाखवणार्‍या पालकमंत्री धनंजय मुंडे यांनी आता तरी प्रत्यक्षात जिल्हा रुग्णालयाची पाहणी करुन या रुग्णालयात सुसुत्रता कशी येईल यासाठी प्रयत्न करावेत. केवळ कोटीच्याकोटी उड्डाणे करुन रुग्णांना जीवदान मिळणार नाही. वास्तव आणि घोषणा यामध्ये मोठा फरक आहे. निदान जिल्हा रुग्णालयात रुग्णाचे होणारे हाल थांबवण्यासाठी तरी पालकमंत्री मुंडे यांनी आता जिल्हा रुग्णालयाकडे लक्ष देण्याची गरज आहे. 

आरोग्य मंत्री टोपेे, एकदा तरी बीडला या!

राज्याचे आरोग्य खाते सांभाळणार्‍या राजेश भैय्या टोपेंनी कोरोना संसर्गात अत्यंत चांगली कामगिरी बजावली आहे.जमिनीवर असणारा मंत्री म्हणून राजेश टोपेंची ओळख आहे. केवळ जालना जिल्ह्यावरच नव्हे तर त्यांनी बीड जिल्ह्याकडेही लक्ष द्यावे. बीड जिल्हा रुग्णालयाची झालेली दयनीय अवस्था एकदा येवून पहा, म्हणजे तुमचे जिल्हा रुग्णालय प्रशासन काय काम करते? हे लक्षात येईल. जिल्हा रुग्णालयात उपचार घेत असलेले अनेक रुग्ण जीवंतपणी मरणयातना भोगत आहेत. त्या बंद करण्यासाठी आरोग्यमंत्र्यांनी एकदा बीडच्या रुग्णालयाला अचानक भेट द्यावी म्हणजे आमचे आरोग्य प्रशासन काय दिवे लावते हे तरी राजेश भैय्यांच्या लक्षात येईल. 

संदिपभैय्या एकदा आरोग्यमंत्र्यांना आणाच

बीडचे आमदार संदीप क्षीरसागर यांनी कोरोना संकटामध्ये रुग्णांना दिलासा देण्याचा प्रयत्न केला मात्र त्यामुळे प्रशासन सुधारले नाही. बीडचे आमदार म्हणून एकदा आरोग्यमंत्र्यांना बीडमध्ये आणा आणि बीड जिल्हा रुग्णालयाची परिस्थिती दाखवा, त्यामुळे तरी जिल्हा रुग्णालयाची परिस्थिती सुधारेल. जिल्ह्यातील रुग्णांचे आणि त्यांच्या नातेवाईकांचे आशिर्वाद मिळण्यासाठी आ.संदीप क्षीरसागर यांनी एकदा आरोग्यमंत्र्यांना जिल्ह्यात आणावेच आणि मस्तावलेल्या आरोग्य प्रशासनाला ताळ्यावर आणावे अशी मागणी होत आहे.