अंबाजोगाई । वार्ताहर

‘तुझ्या जनावरांनी आमच्या गंजीचा कडबा खाल्ला तरी तू आम्हाला दमदाटी करतोस’असे म्हणत एका वृध्दास चौघांनी घरात घुसून मारहाण केली. भांडण सोडवण्यास आलेल्यांनाही मारहाण झाली. या प्रकरणी चौघाजणांविरुध्द ग्रामीण ठाण्यात गुन्हा दाखल झाला. 

शेषेराव रेवा पवार (65,रा.कुरणवाडी तांडा, ता.अंबाजोगाई) असे जखमी शेतकर्‍याचे नाव आहे. रविवारी सकाळी 10 वाजेच्या सुमारास ते घरात थांबले होते. यावेळी तिथे आलेल्या हुसेन सुलेमान गवळी, रमजान सुलेमान गवळी, महमंद सुलेमान गवळी (रा.गवळीपुरा, अंबाजोगाई) व अन्य एक (रा.कुरणवाडी) यांनी संगणमत करुन तुझ्या जनावरांनी आमच्या गंजीचा कडबा खाल्ला तरी तू आम्हाला दमदाटी करतोस म्हणत शेषेराव यांना शिवीगाळ करुन लाथाबुक्यांसह लाकडाने मारहाण करत जखमी केले. भांडण सोडवण्यास गेलेल्यासही मारहाण करत जिवे मारण्याच्या धमक्या दिल्या गेल्या. या प्रकरणी शेषेराव पवार यांच्या वरिल आशयाच्या फिर्यादीवरुन चौघांविरुध्द गुन्हा नोंद झाला.