धारुर । वार्ताहर

तालुक्यातील बोडखा येथील महादेव वस्तीवर शेतात काम करणार्‍या एका शेतकर्‍यावर रानडुक्कराने हल्ला चढवला. यात तो शेतकरी गंभीर जखमी झाला आहे. मंगळवारी (दि.28) ही घटना घडली. 

श्रीकृष्ण धोंडिबा तिडके (38, रा.बोडखा, ता.धारुर) असे जखमी शेतकर्‍याचे नाव आहे. मंगळवारी सकाळी तिडके हे शेतात काम करत होते. यावेळी एका रानडुक्कराने त्यांच्यावर हल्ला चढवला. तिडके यांच्या पोटावर रानडुक्कराने चावा घेतल्याने त्यांना गंभीर दुखापत झाली. परिसरातील शेतकरी व नातेवाईकांनी त्यांना तातडीने धारुर ग्रामीण रुग्णालयात उपचारासाठी दाखल केले. तिथे प्राथमिक उपचार करुन पुढील उपचारासाठी तिडके यांना अंबाजोगाईच्या ग्रामीण रुग्णालयात हलवण्यात आले. दरम्यान अशा स्वरुपाची धारुर तालुक्यातील ही तिसरी घटना आहे. यापुर्वी भोगलवाडी येथील दोन शेतकर्‍यांवर रानडुक्कराने हल्ला केला होता.वाढत्या हल्ल्यांमुळे शेतकर्‍यांत भीतीचे वातावरण आहे.