गृहमंत्री दिलीप वळसे पाटील म्हणाले, मुंबईसह राज्यातील पोलिसांना देखील कोरोना व्हायरसचा सामना करावा लागत आहे. पोलिसांनी नागरिकांच्या सेवेसाठी 24 तास कर्तव्यावर हजर राहावे लागते. त्यामुळे त्यांना देखील कोरोनाचा संसर्ग होण्याची भीती जास्त आहे. मुंबईत गेल्या 24 तासांत 71 पोलिसांना कोरोनाची लागण झाली आहे. यामुळे गृहमंत्रालयाने पोलिसांसाठी ‘वर्क फ्रॉम होमचा मोठा निर्णय घेतला आहे. 55 वर्षांवरील पोलिस कर्मचाऱ्यांनी ड्यूटीवर येण्याची आवश्यकता नाही. ते वर्क फ्रॉम होम करु शकतात. याबाबत आदेश देण्यात आले आहेत. पोलिसांनी देखील कोरोना नियमांचे पालन करावे, असे आवाहन देखील गृहमंत्र्यांनी दिले आहेत. दरम्यान, पहिल्या आणि दुसऱ्या लाटेदरम्यानही पोलिसांना अशा प्रकारचे आदेश देण्यात आले होते, तरीही या काळात जवळपास ५०० पेक्षा जास्त पोलिसांचा कोरोनामुळे मृत्यू झाला होता. त्यात मुंबई पोलिस दलातील जवळपास १२३ कर्मचाऱ्यांचा समावेश होता. त्यामुळे आता लवकर खबरदारीच्या सर्व उपाययोजना करण्यात येत असल्याचे एम. रामकुमार यांनी सांगितले. पोलिस कर्मचारी कामावर असताना त्यांना मास्क, सॅनिटायझर आणि इतर आवश्यक सामग्री वेळोवेळी उपलब्ध करून द्यावी. इतर व्याधी असणाऱ्या सर्व कर्मचाऱ्यांना शक्यतो घरून काम करण्यास सांगावे किंवा लोकांचा संपर्क येणार नाही किंवा कमी संपर्क येईल, अशा ठिकाणी नेमणूक द्यावी, असे आदेश देण्यात आले आहेत. संसर्ग रोखण्यासाठी उपाययोजना राबवण्याचे आदेश - पोलिस स्टेशनचा आजुबाजूचा परिसर, पोलिस कॉलनी अशा ठिकाणी वेळोवेळी स्वच्छता मोहीम राबवून परिसर निर्जंतुक करावा. - पोलिस स्टेशन परिसरात हात निर्जंतुक करण्यासाठी ठिकठिकाणी सॅनिटायझर ठेवावे. - पोलिसांची वाहने सातत्याने निर्जंतुक करावीत. - पोलिस वसाहतीत सतत वैद्यकीय चाचणी शिबिर घेण्यात यावे. - पोलिस कर्मचारी आणि त्यांच्या कुटुंबीयांचं तातडीने लसीकरण करावे.