वाढदिवस साजरा करण्याची थाप

धारूरच्या घाटातील थरारक घटना

 दिंद्रुड | वार्ताहर

 वाढदिवस साजरा करायचा आहे, असे खोटे सांगून एका युवकास पांढऱ्या रंगाच्या गाडीत नेऊन लाथाबुक्क्यांनी व दगडाने मारहाण करून अंगावर पेट्रोल टाकून जीवे मारण्याचा प्रयत्न झाला.धारूर घाटात २१ सप्टेंबरच्या रात्री साडेआठ वाजेच्या सुमारास घडली.या घटनेने एकच खळबळ उडाली.रात्रभर वेदनेने विव्हळत अखेर जखमी अवस्थेत तरुण पोलीस ठाण्यात दाखल झाला, त्यानंतर या घटनेला वाचा फुटली.

 कृष्णा अर्जुन गायकवाड (१९ रा. नाकलगाव, ता.माजलगाव) असे त्या जखमी युवकाचे नाव आहे. वाढदिवस साजरा करायचा आहे, असे सांगून बोलावून घेऊन आदिनाथ सुधाकर गायकवाड (रा. मंगळुरपीर नंबर २ ता. माजलगाव) याने त्याच्या अन्य तीन अनोळखी साथीदारांच्या मदतीने सोबत आणलेल्या पांढऱ्या रंगाच्या गाडीत घेऊन गेले. नंतर कृष्णा गायकवाड यास जखमी अवस्थेत पोत्यात गुंडाळून गाडीत टाकले. सोनीमोहा ते धारूर रस्त्यावरील घाटात आणून सदरील युवकास गाडीच्या खाली उतरून आरोपीतांनी संगनमताने त्यास लाथाबुक्क्यांनी व दगडाने तोंडावर, डोक्यावर मारहाण करून जखमी केले. त्यानंतर कृष्णाच्या अंगावर पेट्रोल टाकून जीवे मारण्याचा प्रयत्न केला.  

याप्रकरणी भीमराव निवृत्ती गायकवाड ( रा.नाकलगाव) यांच्या फिर्यादीवरून दिंद्रुड पोलिसात गुन्हा नोंद झाला असून पुढील तपास फौजदार राडकर करत आहेत.