कु. तेजस्वी शिंदेला मिळणार पूर्ण लाभ तर कु. स्नेहा घोडेस्वार हिचे विद्यापीठ व कोर्स बदलून देखील मिळणार लाभ

मुंबई / प्रतिनिधी

परदेश शिष्यवृत्तीसह अन्य सर्वच योजनांमध्ये विद्यार्थ्यांचे हित लक्षात घेत धडाडीने निर्णय घेण्यामुळे सामाजिक न्याय मंत्री धनंजय मुंडे यांचे वेगळेपण नेहमीच अधोरेखित झाले आहे.  कु. तेजस्वी शिंदे व कु. स्नेहा घोडेस्वार यांच्या परदेश शिष्यवृत्तीमध्ये विशेष बाब म्हणून निर्णय घेत लाभ मिळवून देण्याचा बाबतीतही या दोन्ही विद्यार्थिनींना हाच अनुभव आला आहे. 

 तेजस्वी लक्ष्मण शिंदे ही सातारा जिल्ह्यातील कोरेगाव तालुक्यातील अंगापूर येथील प्रतिभावंत विद्यार्थिनी 'स्पेस सायन्स' अर्थात अंतराळ विज्ञान शाखेत ऑस्ट्रेलिया येथील विद्यापीठात पीएचडी चे शिक्षण घेत असून, जगभरातील निवडक १५० विद्यार्थ्यांपैकी हा बहुमान मिळालेली ती एक विद्यार्थिनी आहे. ऑस्ट्रेलियन विद्यापीठाच्या नियमाप्रमाणे तिला देय असलेली शिष्यवृत्तीची रक्कम परदेश शिष्यवृत्ती च्या मिळणाऱ्या रक्कमेतून वजा करण्याचा मूळ नियम आहे. 

परंतु कु. तेजस्वी हिची आर्थिक परिस्थिती पाहता तिने परदेश शिष्यवृत्तीची पूर्ण रक्कम मिळावी, जेणेकरून तिच्या परदेशातील शिक्षण व उदरनिर्वाहास अडचण येणार नाही, अशी विनंती सामाजिक न्याय विभागाकडे केली होती, ही बाब ना. मुंडे यांना समजताच २७ जुलै २०१७ च्या शासन निर्णयाप्रमाणे परदेश शिष्यवृत्ती योजनेतील देय असलेला पूर्ण लाभ सदर विद्यार्थिनीस देण्यात यावा असा आदेशच ना. मुंडे यांनी विभागामार्फत निर्गमित केल्याने तेजस्वीच्या आनंदाला पारावार उरला नाही; मुलींचे शिक्षण व सक्षमीकरण करण्यासाठी नेहमीच पुढाकार घेणाऱ्या ना. मुंडे यांचे मी मनःपूर्वक आभार मानते, तुमच्यामुळेच माझ्या स्पेस सायन्स पीएचडीची वाट मोकळी होऊ शकली, अशा शब्दात तिने कृतज्ञता व्यक्त केली आहे. 

तर दुसऱ्या एका प्रकरणात नागपूर येथील कु. स्नेहा काशीनाथ घोडेस्वार या विद्यार्थिनीला ऑस्ट्रेलिया मधील सिडनी विद्यापीठात मास्टर ऑफ इंजिनिअरिंगला प्रवेश मिळाला होता व ती परदेश शिष्यवृत्तीस पात्र ठरली होती, मात्र सदर विद्यापीठाने ऐनवेळी तिच्या जागी दुसऱ्या विद्यार्थ्यास प्रवेश दिल्याने स्नेहाच्या डोळ्यासमोर अंधार पडला होता. 

शिष्यवृत्ती योजनेच्या नियमांचा विचार करत, ऑस्ट्रेलिया मधील ऑस्ट्रेलियन राष्ट्रीय विद्यापीठात मास्टर ऑफ इंजिनिअरिंगला प्रवेश मिळवत तिने शिष्यवृत्ती लागू व्हावी याबाबत विनंती केली होती. त्यानुसार ना. धनंजय मुंडे सदर विद्यार्थिनीचे शैक्षणिक नुकसान होऊ नये याचा विचार करत तातडीने एक विशेष बाब म्हणून निर्णय घेत बदललेल्या विद्यापीठातील बदललेल्या कोर्ससाठी परदेश शिष्यवृत्ती लागू करण्याचा निर्णय घेतल्याने स्नेहाच्या चेहऱ्यावर हसू उमलले!

स्नेहा घोडेस्वार हिने आपल्या मास्टर्स ऑफ इंजिनिअरिंगच्या प्रवेशासह परदेश शिष्यवृत्ती मिळण्याचा मार्ग मोकळा करून दिल्याबद्दल ना. धनंजय मुंडे यांचे आभार व्यक्त करण्यासाठी आपल्याकडे शब्दच नाहीत, अशा भावना व्यक्त केल्या.