राष्ट्रवादी - कॉंग्रेस आघाडीचा उमेदवार सांगलीच्या महापौरपदी...

सांगली | प्रतिनिधी

सांगली-मिरज-कुपवाड मनपावर काँग्रेस-राष्ट्रवादी आघाडीचा झेंडा लागला असून राष्ट्रवादीचे दिग्विजय सूर्यवंशी नवे महापौर झाले आहेत. 

राष्ट्रवादी काँग्रेसचे प्रदेशाध्यक्ष आणि जलसंपदा मंत्री जयंत पाटील यांचे एक प्रसिद्ध वाक्य आहे ते म्हणजे 'टप्प्यात आल्यावर कार्यक्रम करतोच' ... आज त्याचाच प्रत्यय आला असून सांगली मनपावर राष्ट्रवादी- काँग्रेस आघाडीचा महापौर बसला आहे. 

सांगली- मिरज आणि कुपवाड महापालिकेत ७८ जागा असून यामध्ये पक्षीय बलाबल भाजप - ४१, अपक्ष - २, काँग्रेस - २० राष्ट्रवादी-१५ असे होते. 

राष्ट्रवादीचे दिग्विजय सुर्यवंशी यांनी भाजपचे उमेदवार धीरज सुर्यवंशी यांचा ३ मतांनी पराभव केला. भाजपची सहा मते फोडण्यात काँग्रेस-राष्ट्रवादी आघाडीला यश आले. तर दोन नगरसेवक अनुपस्थित राहिल्याने आघाडीच्या विजयाचा मार्ग सुकर झाला. राष्ट्रवादीच्या दिग्विजय सुर्यवंशी यांना ३९ मते मिळाली तर भाजपच्या धीरज सुर्यवंशी यांना ३६ मते मिळाली.

चार उमेदवारांपैकी दोघांनी माघार घेतल्यामुळे सांगली महापौरपदासाठी राष्ट्रवादीच्या दिग्विजय सुर्यवंशी आणि भाजपच्या धीरज सुर्यवंशी यांच्यात मुख्य लढत झाली. भाजपचे सात नगरसेवक अंतिम क्षणापर्यंत नॉट रिचेबल होते. त्यामुळे बहुमत असूनही भाजपला सत्ता टिकवण्यासाठी धडपड करावी लागली मात्र ती अखेर व्यर्थ ठरली असल्याचे समोर आले आहे.

भाजपची अडीच वर्षाची सत्ता संपुष्टात 

• एकूण मतदार : ७८
• मयत सदस्य : १
• मतदार  : ७७
• तटस्थ मतदार :२ 
• दिग्विजय सूर्यवंशी :३९
• धीरज सूर्यवंशी :३६

सांगली महापालिकेच्या महापौर, उपमहापौर पदाची निवडणूक मंगळवारी सकाळी साडेअकरा वाजता सुरु झाली. त्यासाठी प्रशासनाने पूर्ण तयारी केली होती. उमेदवारी अर्ज मागे घेण्याची प्रक्रियाही ऑनलाईन पद्धतीनेच झाल्याने असल्याने सभागृहात नगरसेवकांची उपस्थिती बंधनकारक नव्हती.

महापौर पदासाठी निवडणूकीत राष्ट्रवादीचे दिग्विजय सूर्यवंशी व भाजपचे धीरज सूर्यवंशी यांच्यात लढत होती. राष्ट्रवादीचे उमेदवार मैनुद्दीन बागवान यांनी उमेदवारी अर्ज मागे घेतला होता, पण दिग्विजय सूर्यवंशी यांचा अर्ज कायम ठेवला. पीठासन अधिकाऱ्यांकडून मतांची नोंदणी झाल्यानंतरच प्रकीया पूर्ण केली.

भाजपच्या विजय घाडगे, महेंद्र सावंत यांनी आघाडीला मतदान केले, तर स्नेहल सावंत, अपर्णा कदम, नसिमा नाईक या नगरसेवकांनी राष्ट्रवादीचे उमेदवार दिग्विजय सूर्यवंशी यांना मतदान केले. रईसा रंगरेज गैरहजर राहील्या. पीठासन अधिकाऱ्यांनी महापौर म्हणून दिग्विजय सूर्यवंशी यांना विजयी घोषित केले.

भाजपचे महापौर पदाचे उमेदवार धीरज सूर्यवंशी यांनी निवडणूक प्रक्रियेवर आक्षेप घेतला असून जे उमेदवार ऑनलाइन दिसत नाही त्यांचे मतदान कसे होणार? ही प्रक्रिया बरोबर नाही अशा आरोप धीरज सूर्यवंशी यांनी केला आहे.

कोरोनामुळे महापालिकेच्या महापौर, उपमहापौर निवडीची प्रक्रिया ऑनलाईन पद्धतीने घेण्याचे आदेश शासनाने दिले. त्यानुसार महापालिकेच्या मुख्य सभागृहात व्हिडीओ कॉन्फरन्सिंग व्यवस्था केली होती. नगरसेवकांना सभेपूर्वी अर्धा तास लिंक पाठविली होती. सभेपूर्वी सर्वजण लिंकच्या माध्यमातून ऑनलाईन निवडणूक प्रक्रियेत सहभागी झाले.