मुंबई । वार्ताहर

 राज्य मंत्रिमंडळाच्या बैठकीत आज पोलीस भरती संदर्भात महत्त्वाचा निर्णय घेण्यात आला आहे. राज्यात साडे बारा हजार पदांसाठी पोलीस भरती होणार आहे. पहिल्यांदाच इतक्या मोठ्या प्रमाणात पोलीस भरती होणार आहे. पोलीस भरतीची प्रक्रिया लवकर सुरू करण्यात येईल, अशी माहिती गृहमंत्री अनिल देशमुख यांनी बैठकीनंतर दिली आहे.

गेल्या ६ महिन्यांपासून राज्यात कोरोनामुळे सगळ्यांचच आर्थिक गणित कोलमडलेलं असताना आता राज्य सरकारने एक महत्त्वाचा निर्णय घेतला आहे. राज्यामध्ये तब्बल १२ हजार ५०० पोलिसांची नव्याने भरती केली जाणार आहे. यासंदर्भात आज झालेल्या मंत्रिमंडळ बैठकीमध्ये निर्णय घेण्यात आला आहे. बैठक झाल्यानंतर राज्याचे गृहमंत्री अनिल देशमुख यांनी पत्रकारांशी बोलताना यासंदर्भात माहिती दिली आहे. त्यामुळे राज्यात पोलीस भरतीसाठी इच्छुक असलेल्या उमेदवारांसाठी ही दिलासादायक आणि आनंदाची बातमी ठरली आहे. कोरोना काळात राज्याची आर्थिक स्थिती खालावत चाललेली असताना अशा प्रकारचा निर्णय होणं ही आनंदाची बाब असल्याची प्रतिक्रिया आता पोलीस भरतीसाठी इच्छुक असलेल्यांमधून उमटू लागली आहे.

आज झालेल्या राज्य मंत्रिमंडळ बैठकीमध्ये महाराष्ट्रात १२ हजार ५०० पोलिसांची नव्याने भरती करण्याचा निर्णय घेण्यात आला आहे. महाराष्ट्राच्या इतिहासात पहिल्यांदाच इतक्या मोठ्या संख्येने पोलीस भरती होणार आहे. या भरतीची प्रक्रिया लवकरच सुरू केली जाणार असून त्यासंदर्भात माहिती जाहीर केली जाईल. राज्यातल्या शहरी आणि ग्रामीण भागातील तरुण-तरुणींना याद्वारे पोलिसात भरती होण्याची संधी मिळणार आहे.

अनिल देशमुख, गृहमंत्री

या भरतीमध्ये पोलीस शिपाई संवर्गातील १२ हजार ५२८ पदे १०० टक्के भरण्यात येत आहेत. यासंदर्भात वित्त विभागाच्या ४ मे २०२० च्या शासन निर्णयातून सूट देण्याचा निर्णय मंत्रिमंडळ बैठकीत घेण्यात आला. सर्वोच्च न्यायालयाने सामाजिक व शैक्षणिक दृष्टया मागासवर्गाच्या आरक्षणास दिलेल्या अंतरिम स्थगितीच्या पार्श्वभूमीवर या प्रकरणी सामान्य प्रशासन विभाग व विधी व न्याय विभागाच्या सल्ल्यानुसार पुढील कार्यवाही करण्याचे मंत्रिमंडळाने गृह विभागाला निर्देशित केले आहे. पोलीस शिपाई संवर्गातील २०१९ या वर्षामधील ५२९७ पदे तसेच २०२० या वर्षामधील ६७२६ पदे व मिरा-भाईंदर-वसई-विरार पोलीस आयुक्तालयासाठी निर्माण करण्यात आलेल्या पहिल्या टप्यातील नवनिर्मित ९७५ पदांपैकी पोलीस शिपाई संवर्गातील ५०५ अशी एकूण १२ हजार ५२८ पदे १०० टक्के भरण्यात येणार आहेत.

बाळासाहेब ठाकरे रस्ते अपघात विमा योजना राबविणार

राज्यात बाळासाहेब ठाकरे रस्ते अपघात विमा योजना राबविण्यास आज झालेल्या मंत्रिमंडळ बैठकीत मान्यता देण्यात आली आहे. यासाठी राज्य आरोग्य हमी सोसायटीस आर्थिक अनुदान उपलब्ध करून देण्यात येईल त्याचप्रमाणे विहित पद्धतीने विमा कंपन्यांची निवड करण्यात येईल.

या योजनेत महाराष्ट्रातील रस्त्यावर झालेल्या अपघातामधील व्यक्तींना याचा फायदा मिळणार आहे. ही व्यक्ती कोणत्याही राज्य, देशाची असली तरी देखील त्यांना योग्य ते वैद्यकीय उपचार देण्यात येतील. अपघातग्रस्तांना गोल्डन तासामध्ये तत्परतेने वैद्यकीय सेवा व आर्थिक मदत उपलब्ध करून देण्यासाठी या योजनेचा उपयोग होईल. आजमितीस राज्य महामार्ग तसेच ग्रामीण रस्त्यांवर अपघातात दरवर्षी सरासरी 40 हजार व्यक्ती जखमी तर 13 हजार व्यक्ती मरण पावतात. यांना वेळीच उपचार मिळाले तर त्यांचे प्राण वाचू शकले असते.

या योजनेत पहिल्या 72 तासासाठी जवळच्या रुग्णालयांमधून उपचार करण्यात येतील. सुमारे 74 उपचार पद्धतीतून 30 हजार रुपयांपर्यंतचा खर्च मोफत केला जाईल. यामध्ये अतिदक्षता विभाग व वॉर्डामधील उपचार, अस्थिभंग तसेच रुग्णालयाच्या वास्तव्यातील भोजन याचा समावेश आहे. यामध्ये औद्योगिक अपघात, दैनंदिन कामातील किंवा घरी घडलेले अपघात व रेल्वे अपघाताचा समावेश नाही.या योजनेसंदर्भात कोणतीही तक्रार नोंदविण्यासाठी टोलफ्री क्रमांक देखील असणार आहे.

बैठकीत घेण्यात आलेले इतर निर्णय :

• राज्यातील सर्व जिल्ह्यांमध्ये कृषी महोत्सव आयोजित करण्यात येणार आहे. हा महोत्सव 5 दिवसांचा असेल कोरोनाची परिस्थिती आटोक्यात आल्यास या वर्षात राबविण्यात येईल.
• कांदा निर्यायतबंदी संदर्भात आज राज्य मंत्रिमंडळातील सदस्यांनी तीव्र भावना व्यक्त केल्या. यासंदर्भात केंद्राला तातडीने पत्र पाठविण्यात येईल तसेच पाठपुरावा करून निर्यातबंदी उठविण्यासंदर्भात प्रयत्न करण्यात येईल असे मुख्यमंत्री उद्धव ठाकरे यांनी सांगितले